Veertig jaar van die Afrikaanse kultuurgeheue – en ’n lewende tydskrif wat steeds groei.
DEKAT het in 1985 verskyn – in die diamantjaar van Afrikaans as amptelike taal – as ’n nuwe tydskrif met die klem op gehalte. Vier dekades later staan daardie belofte steeds: intelligente, gesaghebbende leesstof vir die ingeligte, oordeelkundige leser.
Waarvandaan “DEKAT”?
DEKAT is genoem na die Kat in die Kasteel die Goeie Hoop – die oorlangse konstruksie wat die binnehof in twee verdeel, ter beveiliging van die vesting. Op dié Kat staan die beroemde Thibault-balkon met sy Anreith-versiering, ook bekend as die De Kat-balkon. Die naam verwys na ons vervlegte Hugenote-, Geuse- en Dietse herkoms.
Die Kat self is ’n sluitstruktuur – ’n skans wat die vesting se skatte beskerm. So is DEKAT bedoel as ’n skans vir norme: vir gehalte, vir taal, vir kultuur.
Nie net ’n lewe nie, maar ’n goeie lewe
Hierdie woorde het in die heel eerste uitgawe gestaan. Dit was nog altyd DEKAT se maatstaf: nie blote vermaak nie, maar ’n lewenspeil gerig op die instandhouding van gehalte.
Om sy hoë standaard te handhaaf, het DEKAT van die staanspoor af op alle terreine medewerkers gewerf wat reeds vir hul prestasies bekroon was – Hennie Aucamp · W.A. de Klerk · P.G. du Plessis · Anna M. Louw · Rykie van Reenen · Louis Krüger · Madeleine van Biljon · Martie Meiring · Thys Odendaal · Amanda Botha · William Pretorius – met buitelandse korrespondente in Londen, Nice, Milaan, Los Angeles en Genève.
Daardie toewyding aan gehalte het nooit verander nie. Deur die jare het die grootste name in Afrikaans vir DEKAT geskryf, en het die tydskrif stories vertel wat hul tyd vooruit was – oor kuns, taal, geskiedenis en die samelewing.
Veertig jaar, vele hande
DEKAT is gevorm deur ’n reeks redakteurs, elk met ’n eie stem – maar almal getrou aan dieselfde standaard.
Ons brei uit
Vandag word DEKAT deur African Sky Publishing uitgegee, onder die leiding van redakteur en eienaar Elzilda Becker. Sedert 2006 verskyn dit ook in Engels.
DEKAT druk steeds boeke – onder meer die jaarlikse DEKAT LUX, ’n luukse 320-bladsy-koffietafelboek. Ons gaan nié heeltemal aanlyn nie; ons brei uit. Naas die gedrukte uitgawes is daar nou ’n lewende digitale tydskrif, ’n maandelikse nuusbrief en DEKATv.
En ná jare se werk het ons elke uitgawe sedert 1985 saamgestel tot één volledige argief – ’n kultuurskat van veertig jaar – wat nou aanlyn beskikbaar is. Die Afrikaanse storie, op een plek, deursoekbaar en bewaar.