Boerekos raak sexy

“Ek is Annelien Pienaar … en ek is gek oor kosmaak,” is hoe dié baas- kok se blog, Boerekos met ’n twist begin en dit is haar wens dat elkeen wat ’n resep van haar volg ’n suksesvolle gereg sal voorsit

Hannelie van As het met haar gesels.

Foto’s: Hanneri de Wet en Myburgh du Plessis

Ek het as kind vir almal – my sussies, diere, niggies, nefies, bome, klippe, bosse en die veld skoolgehou. Ek het vir alles en almal koekies gebak en al was die deeg soms vuil, het my ma dit altyd geproe (en seker skelmpies uitgespoeg!)”
Annelien Pienaar is klein en blond. Sy gesels met haar hande en sy is duidelik haar dogtertjie, wat skaam agter haar rug wegkruip, se heldin. Wanneer sy begin gesels, begin mens besef hoeveel “oemf” daar in dié mens is.

Sy het in 1999 as voedsel- en kledingtegnoloog gekwalifiseer en vanaf 2000 as dosent begin werk. So het haar kleintyddroom – om vir mense iets te leer, waar geword.

“Ek het my studente altyd aangemoedig om meer uit ’n resep te haal as wat die metode aangedui het.”

In 2009 begin sy haar eie besigheid in Skeerpoort, grootliks om meer tyd met haar kinders deur te bring, by die Bos en Berg-gasteplaas, wat eers ’n koeistal was.

“My vriendinne en mededosente het my aangemoedig om met kook- en naaldwerkklasse te begin, en voor ek my oë kon uitvee, kon ek byna nie voorbly nie.”

Die klasse is deels so suksesvol omdat dit klein en intiem is, en studente waarlik haar volle aandag kry.

“Die koeistal moes ’n groot transformasie ondergaan en dit het 12 maande geneem om die plek in ’n opleidingsgerief en gastehuis te omskep. Die tafels en toonbank is gemaak uit ou staldeure, en met die res van die afvalhout is hortjies vir die vensters gemaak wat wonderlik werk vir kosfotografie!”

Pienaar het ’n groot platform gekry toe sy Boerekos met ’n twist begin het. Sy het gevoel daar is baie resepte wat die rondte doen wat nie getoets is nie, en sy wou mense ’n flatervrye opsie gee.

Die resepte op haar baie suksesvolle blog (wat meer as 2,3 miljoen besoeke kry) is goed uitgewerk met ’n les in elkeen. Daar word baie duidelik uitgespel watter probleme kan opduik, en hoe om dit te hanteer.

Haar blog begin met die woorde: “Ek is Annelien Pienaar … en ek is gek oor kosmaak.”

Pienaar lag.

“Dis regtig my wens dat elke resep van Boerekos met ’n twist wat mense aanpak, ’n sukses sal wees.”

Almal moet kosmaak – dit kan net sowel stresvry wees! Hoewel sy spesialisopleiding in die Franse kookkuns gehad het, word klassieke voedselbereidingstegnieke altyd eerste gestel. Dit klink na ’n mondvol, maar Pienaar dra in haar onopgesmukte manier

die lesse op so ’n manier oor dat elke student dit kan verstaan.

Wanneer Pienaar nie klasgee nie, ry sy die land vol om as konsultant te help om bakkerye en kaasfabrieke op te rig en probleme op te los. Sy tree ook gereeld by feeste op om haar spesialiskennis van onder meer suurdeeggebak (sourdough) en kaasmakery te deel.

Haar pragboek Boerekos met ’n twist het in Julie vanjaar op die rakke verskyn en is ’n moet vir elke Suid-Afrikaner. Die resepte is nie net onfeilbaar nie, dit gee ook inspirasie vir oud en jonk.

As Christen is Kersfees vir haar belangrik. Sy gesels graag oor hoe sy dit as kind ervaar het. “Ons is geleer dat Jesus die grootste geskenk is, en dat ons ons dankbaarheid moet wys deur sy liefde in alle vorms aan ons naaste te betoon. Ons het altyd klein persentjies gekry, want dit was die gedagte en die samesyn wat belangrik was. En dan het ons altyd vir die ouetehuis en die werkers op die plaas pakkies gepak met alles wat tuisgemaak is.”

 

Ons het Pienaar ’n paar vrae gevra om haar beter te leer ken:

Wat dink jy is die belangrikste “bestanddeel” (vaardigheid) wat ’n sjef moet hê?

Eindelose geduld om aan te hou oefen met tegnieke en visualisering van die eindproduk.

 

Is daar enige interessante tendens wat op die oomblik in die kosbedryf die botoon voer?

Definitief ongekompliseerde, eenvoudige disse met ’n sterk botoon van vars en gesond.

 

Is daar ’n sjef wat jy bewonder – en hoekom?

Gordon Ramsey vir sy passie en sy reguit eerlike manier van praat. Jy weet verseker waar jy met hom staan en sy opdragte is eenvoudig en duidelik.

 

Wat is jou gunstelingkos?

Ek hou van mezze-styl kosse omdat ek nie lief is vir groot etes nie, maar eerder peusel. Dit is heerlik om snoephappies so om die tafel met vriende en familie te deel. Verder is mezze ook gepak met geur, tegnieke en kleure.

 

As jy ’n driegangmaal kan voorsit om die somer te vier, wat sal dit wees?

Voorgereg: Biltongpatee met soetrissiesous en geroosterde dun skyfies ciabata met knoffelbotter en dille-infusie.

Hoofgereg: Skaapboud, stadig gaargemaak in die oond met knoffel, roosmaryn en suurlemoen, uitmekaargerafel en bedien met ouma Hantie se knoffelsuurroomsous. Stampmielies wat gemarineer is met soetsuur, ’n dillesousie en roerbraai-groente.

Nagereg: Pavlova met bessie-ontploffing en ment.

 

Wat maak jou gelukkig in die kombuis?

Toerusting wat werk. My kruie en speserye en spensrakke wat vol proviand gelaai is.

 

Wat is jou gunstelingbestanddeel om mee te werk?

Fenegriek.

 

Het jy ooit voor ’n geleentheid ’n groot flater in die kombuis begaan, en indien wel, hoe het jy dit reggemaak?

Ek het strooisuiker vir sout aangesien in ongemerkte houers. Ongelukkig was daar geen genade nie – ek moes maar oor begin.

 

As jy enigiets anders kon doen vir ’n lewe, wat sou dit wees?

Arbeidsterapeut, gespesialiseer in kinders met leergestremdhede.

 

Is daar dinge van die kosbedryf wat jou dwars in die krop steek?

Ek dink dat restauranteienaars soms beter na hul personeel kan omsien, aandag gee aan opleiding en billike vergoeding en voorsiening maak vir mense wat ver moet reis om in die nag eerder oor te bly waar dit nader en veiliger is.

 

As jy kan kies – wyn, bier of ’n fênsie mengeldrankie?

Ek is ’n wynmeisie, merlot of shiraz.

 

As jy R5 miljoen kry, wat sou jy daarmee wou doen?

Reis! Verder studeer! My kameratoerusting opgradeer.

 

Wat het jy gisteraand vir aandete gehad?

Ek moes vir die gaste in die gastehuis kook, so ons eet gewoonlik maar wat ek vir hulle maak. My immer gewilde lasagne met beetblatjang en tuinslaai.

 

Wat is jou idee van die beste moontlike vakansie?

Daar is ’n stil, wegsteekstrandjie waarheen ons altyd gaan. Geen mense in sig nie, net stilte. Daar kan ons mekaar geniet en slaap, lees, eet, slaap, deur straatjies stap, kuier, eet en slaap!

 

Watter raad sal jy vir jou kinders gee oor die grootmenslewe wat op hulle wag?

Gaan studeer waartoe jou hart jou roep, moenie iets doen ter wille van geld nie. Vra jouself die vraag af of jy elke dag vir die volgende 60 jaar dieselfde ding wil doen? Reis en sien die wêreld.

 

Webblad: https://annelienpienaar.co.za/ Facebook-groep: Boerekos met ’n Twist (20 500 volgelinge) www.bosenbergguestfarm.co.za

 

’n Paar van Pienaar se wenke om die perfekte koek te bak:

  • Om te voorkom dat daar te vinning ’n korsie op die koek se bokant vorm voordat die koek geset het: plaas ’n staalbakkie met water onder in die oond sodat dit stoom kan produseer en die korsie voorkom. ’n Halwe koppie water is genoeg. Ek doen dit altyd en het nog nooit weer ’n probleem gehad nie.
  • Koeke rys onegalig in die oond: dit gebeur as die panne te na aan mekaar of die oond se wande staan. Dit rys na mekaar of na die kante toe. Maak seker dat daar genoeg ruimte – sowat 5 cm – tussen die panne en die wande van die oond is.
  • Koek is droog: die pan waarin jy dit gebak het, is waarskynlik te groot en die baktyd dus te lank en warm. Maar onthou, nou het jy sponsvingers vir tiramisu!
  • Alle bestanddele moet by kamertemperatuur gebruik word. Koue meel kan ’n koek laat platval of met ’n kompakte tekstuur laat.

 

RESEP

Turkish Delight-kweperjellie

Lewer 1 kg

Hierdie jellie is goud werd in my alledaagse bak-en-brouwerk. Die geur is dié van Turkse lekkergoed – lig en pikant. Die kleur varieer van kooksel tot kooksel; dit hang onder meer af van die ouderdom van die vrug – soms is dit strooikleurig en soms pienk. Ons geniet die jellie as versoeter saam met muesli, neute en ons tuisgemaakte jogurt. Dis die perfekte pasmaat vir gerookte varkvleis soos ribbetjie, boud en skenkel; ook vir hoender. Dan bly dit ook immergewild op vanieljeroomys, wafels, pannekoek, plaatkoekies en natuurlik varsgebakte brood.

BESTANDDELE:

1 kg gewaste kwepers, grof gekap met die skil aan

15 ml (1 e) koljandersaad

sap en pitte van 2 suurlemoene

1 liter (4 k) water

ongeveer 800 g (4 k) suiker

5 ml (1 t) rooswater

 

METODE:

  1. Plaas die kwepers in ’n diep kastrol en voeg die koljandersaad, suurlemoensap en -pitte asook die water by. Kook saam vir 11⁄2 uur oor matige hitte.

2.Verwyder die kokende mengsel van die hitte en laat effens afkoel. Plaas ’n sif wat met kaasdoek uitgevoer is, oor ’n kastrol.

  1. Giet die mengsel in die uitgevoerde sif en laat oornag staan sodat die vog kan dreineer. Dit is uiters belangrik dat die vloeistof met behulp van gravitasie moet deursyg; dit moenie geforseer word nie.
  2. Meet die sap wat deurgesyg het. Voeg pektien by indien nodig. Voeg 450 g (2 k) witsuiker by vir elke 600 ml sap. Giet die sap saam met die suiker in ’n diep kastrol en verhit oor lae hitte terwyl jy aanhoudend roer totdat die suiker opgelos het.
  3. Kook die stroop dan teen hoë hitte vir ongeveer 8-12 minute totdat die jellie 105 oC op ’n suikertermometer bereik. Skep enige skuim wat vorm af. Voeg die rooswater by en roer goed deur.
  4. Skep die jellie in warm, gesteriliseerde glasflesse en draai styf toe. Laat goed afkoel voordat dit skoongevee word.

Vir meer van Annelien se resepte, koop die November/Desember 2017 uitgawe van DEKAT.

 

By | 2017-12-21T10:34:35+00:00 December 21st, 2017|Kos|